Соңғы қоңырау

    Бұған дейін «Жапырақ ғұмыр сыбдыры», «Кешкі самал», «Ай сәулесі», «Қыран ғұмыр», «Ой өрнек» кітаптары жарық көріп, баспасөз беттерінде оқырмандарынан жақсы пікірлерге ие болған ақын-ұстаз Мәпіш Шәріпқызының қолынан шыққан бұл алтыншы жинаққа енген өлеңдері мен прозалық шығармаларын оқып отырсаң, қаламгердің сезімінің сергектігіне, қиялының ұшқырлығына, сөз қолданудағы байлығына тәнті боласын. Бұл тек көркемдік жағынан бағалау болса, ұрпаққа берер тағлымдық құндылығы орасан зор. Мұнда жалаң насихат емес, оларды оқыған адамды ойландырмай қоймайтын әрі бей-жай қалдырмайтын шығармалар.

    Туындыгердің Баянға, Ақшиге деген құрметі мен сағынышы қазіргі көтеріліп жатқан «Туған жер» деген бағдарламаға үн қосқандай, қала берді «Тұрған жер туған жермен егіз бе екен» деген өлеңінің өзі бұрын ешкім айтпаған тың тақырып. Ал «Ұлы даланың жеті қыры» атты Елбасы көтерген бағыттағы музей туралы, дәстүр туралы, есімдері халқымыздың ұлттық құндылығына айналған тұлғаларға арналған өлеңдер де көптеп табылады.